شەهیدانی ٩ی گوڵان؛ هەڤاڵ شیرین عەلەمهوولی و هەڤاڵانی لە زیندانی تاریک پەرەستانی کۆماری سێدارەی ئێران بە بەرخۆدانی خۆیان بڵێسەی هیوا و ئازادیان جارێکی دیکە لە ناو دڵی گەل لە ڕۆژهەڵاتی کوردستان ژیاندەوە. لە کەسایەتی شەهیدانی ٩ی گوڵاندا سه‌ره‌تا هەموو شەهیدان و بەتایبەتی شەهیدانی مانگی گوڵان بە بیر دێنینەوە و سەری ڕێز و نەوازش لە ئاست گەورەییاندا دادەنەوێنین و په‌یمانمان له‌ پێناو درێژه‌پێدانی رێگایان نوێ ده‌كه‌ینه‌وه‌.

سیاسەتە نەگریسەکانی رژێمی ئێران له‌پێناو هێشتنەوەی کورسی دەسەڵات، لە سەر گەلانی خاوەن پرنسیب و کۆڵنەدەر بە هەموو جۆرەکانییەوە بەردەوامە. لە هەر قۆناخێک و بە هەر شێوازێک دەیهەوێت چۆک بە ئیرادەی ئازادی خوازان دا بهێنێت و بە لە سێدارەدانی هەڤاڵانمان لە زیندانی ئەوین له‌ساڵی 2010  ویستی کۆتایی بە بەرخۆدانی گەلی کورد بهێنێت، بەڵام غافڵ بوو لەوەی کە گەل لە پێناو بە دەست خستنی مافە ڕەواکانی خۆی بە دەیان جار ڕووبەڕووی ئەم کردەوانە بوەتەوە و هیچ کاتێک نە تەنیا بە سێدارەدان چاو ترسێن نابێت بەڵکوو هەستی تۆڵەسەندنەوەی لە بەرامبەر داگیرکەری دا بەتینتر دەبێتەوە.

خۆڕاگری شەهیدانی ٩ی گوڵان لە زیندانی ئەوین کە میرات گری خۆراگرانی زیندانی ئامەدە، سەڵمێنەری ئەو ڕاستییەیە کە لە ئێستادا جگە لە به‌رخۆدانی و به‌رزكردنه‌وه‌ی ئاستی تێكۆشان بەرامبەر ئەو هەموو چەواشەکارییەی کە دەوڵەتی ئێران لە بەرامبەری گەلان دا بەرێوەی دەبات ڕێگایەکی دیکەی نییە، بەڵام ئێمە دەبێت ئەوە بزانین کە لە ئێستادا لە هەر کاتێک زیاتر نزیکین لە گەیشتن بە ئازادی و بێگۆمان خۆڵقێنەری ئەم رۆژەش شەهیدانن.

هەڤاڵ شیرین عەلەم هوولی وەکوو کچێکی زاگروس نشین بەو قارەمانییەتییە بێ وێنەیەی مێژووی بەرخۆدانی هەزاران ساڵەی دایکە-خوداوەندی لە ناو دڵی ژنانی ڕۆژهەڵات دا زیندوو کردەوە و وانەی بەهێزی و بوێری بۆ تەواوی ژنانی ئازارچێشتوو دووبارە کردەوە. هه‌روه‌ها له‌ یەکێک لە وتە بەنرخەکانی دا دەڵێت: "ره‌نگه‌ ئێوە بتوانن گیانمان بستێنن، به‌ڵام ناتوانن ئیرادە و شه‌ره‌فمان تەسلیم وەربگرن" و بە چالاکییە بێ وێنەکەی کە بۆ تۆڵەسەندنەوەی شەهیدبوونی هەڤاڵانی، واتا هەڤاڵ ڕووناهی وان، چالاک جوانڕۆ، شه‌هیدانی راگه‌یاندنی په‌ژاك (1ی گوڵان) ئەوەی بە داگیرکەران، بەتایبەت ده‌وڵه‌تی زلهێز و سێداره‌ی ئێران سه‌لماند کە کەسایەتی ئاپۆچی بۆ چرکە ساتێکیش غافڵ نابێت لە خوێنی شەهیدانی و تۆڵه‌یان ده‌كاته‌وه‌ ئه‌گه‌ر به‌ به‌خشینی گیانیشی بێت.

هه‌موو ئه‌م سیاسه‌تانه‌ به‌رامبه‌ر به‌ فكر و ڕامانی ئازاد ئه‌وه‌ی به‌ ئێمه‌ سه‌لماند كه‌ دوژمنانی گه‌لی كورد و کوردستانی خاوەن یەک زیهنییەتن بە تایبەت بەرامبەر فکری نەتەوەیی، دیموکراسی و ئازادیخوازی، بەڵام ئێمە وەکوو گەلی کورد بەتایبەت ژنان لە پێناوی وەدیهێنانی ئەو خاڵانەدا قوربانی زۆرمان داوە، لەیلا قاسم نموونەی هەرە بەرچاوە له‌ باشوری كوردستان کە بوێرانە لە بەرامبەر رژێمی چەوسێنەری بەعسی سەدام ڕاوەستا و ته‌نانه‌ت له‌پای سێداره‌ش دا ته‌سلیمی داخوازی دوژمن نه‌بوو، سه‌ری دا به‌ڵام شه‌ره‌ف و ئیراده‌ی نه‌دا.

مێژوومان ئه‌وه‌ی به‌ ئێمه‌ نیشان داوه‌ كه‌ وه‌كوو گه‌لی كورد هه‌ركاتێك ڕووبه‌ڕووی قۆناخێكی هه‌ستیار و مه‌ترسیدار بووینه‌ته‌وه‌، به‌ پشت به‌ستن به‌هێز و ئیرادەی خۆمان ئەو قۆناخەمان بە سەرکەوتووانە تێپەرکردووە. بێگومان ئێستاش کە لە قۆناخێکی هەستیار و چارەنووس سازدا تێپەر دەبین بۆ سەرخستنی ئەم قۆناخە هەستیارە پێویستی بە پێشەنگایەتی هه‌یه‌، هەڤاڵ لەیلا و هەڤاڵانی لە زیندان دا و گەلی کورد لە پارچەکانی کوردستان و هەروەها هەندەران بە چالاکییە بێ وێنەکەیان پێشەنگایەتی ئەم لاپەرە نوێیەی مێژوویان له‌سه‌ر شانی خۆیان داناوه‌. ئه‌مه‌ش ته‌نیا یه‌ك په‌یامی بۆ ئێمه‌ ژنان و به‌گشتی گه‌لی كورد هه‌یه‌ كه‌ جگه‌ له‌ ژیانێكی ئازاد هیچ رێگا چاره‌یه‌كی ترمان نییه‌ و بۆ گه‌یشتن به‌و ئاسته‌ له‌ ژیاندا پێویست بكات گیانیشمان به‌خت بكه‌ین.

بۆیه‌ وه‌كوو كۆمه‌ڵگه‌ی ژنانی رۆژهه‌ڵاتی كوردستان داوامان له‌ هه‌موو ژنان و به‌گشتی گه‌لی كورد ئه‌وه‌یه‌ بۆ خاوه‌نداریه‌تی كردن له‌ شه‌هیدانی ٩ی گوڵان و به‌گشتی هه‌موو شه‌هیدانی رێگای ئازادی و هه‌روه‌ها به‌رخۆدانی مانگرتووان شیرین ئاسا به‌ گژ دوژمن و داگیركاران دا بچینه‌وه‌ و ببینه‌ چقڵی چاوی نه‌یارانمان. به‌ خۆرێكخستن كردن و یه‌كگرتنمان به‌تایبه‌ت به‌ بۆنه‌ی ئه‌م رۆژه‌وه‌ یادی شه‌هیدان به‌رز رابگرین و درێژه‌ به‌ تێكۆشانی بێ وێنه‌یان بده‌ین. ئاستی به‌رخۆدانی بگه‌ینینه‌ لووتكه‌ و سه‌ركه‌وتن قازانج بكه‌ین.

 کۆمەڵگای ژنانی ئازادی ڕۆژهەڵاتی کوردستان(کەژار)

08/05/2019